லக்னோ:
80 பாராளுமன்ற தொகுதிகளை கொண்ட உத்தரப்பிரதேசம் மாநிலத்தில் பாஜக, காங்கிரஸ் ஆகிய தேசிய கட்சிகள் நேருக்குநேர் மோதுகின்றன. மாயாவதி தலைமையிலான பகுஜன் சமாஜ் மற்றும் அகிலேஷ் யாதவ் தலைமையிலான சமாஜ்வாதி கட்சி கூட்டணி அமைத்து தேர்தலை சந்திக்கின்றன.
இந்நிலையில், இன்று காலை பாஜக தொண்டர்களுடன் பேரணியாக சென்று லக்னோ மாவட்ட கலெக்டரிடம் தனது வேட்பு மனுவை ராஜ்நாத் சிங் தாக்கல் செய்தார்.
அனைத்து கட்சிகளின் சார்பிலும் பல தொகுதிகளுக்கான வேட்பாளர்கள் அறிவிக்கப்பட்ட நிலையில் லக்னோ தொகுதியில் ராஜ்நாத் சிங்கை எதிர்த்து போட்டியிடும் காங்கிரஸ் வேட்பாளர் பெயர் இன்னும் அறிவிக்கப்படவில்லை. இதேபோல் பகுஜன் சமாஜ்-சமாஜ்வாதி கூட்டணி சார்பிலும் வேட்பாளர் அறிவிக்கப்படவில்லை.
பிரபல பாலிவுட் நடிகரும் சமீபத்தில் பாஜகவில் இருந்து விலகிய பாட்னா சாகிப் தொகுதி எம்.பி.யுமான சத்ருகன் சின்காவின் மனைவி பூனம் சின்கா லக்னோ தொகுதியில் ராஜ்நாத் சிங்கை எதிர்த்து போட்டியிடும் பகுஜன் சமாஜ்-சமாஜ்வாதி கூட்டணி வேட்பாளராக நிறுத்தப்படலாம் என முன்னர் சில தகவல்கள் வெளியாகின.
இந்நிலையில், லக்னோ நகரில் உ.பி. முன்னாள் முதல் மந்திரி அகிலேஷ் சிங் யாதவின் மனைவி டிம்பிள் யாதவ் முன்னிலையில் சத்ருகன் சின்காவின் மனைவி பூனம் சின்கா இன்று சமாஜ்வாதி கட்சியில் இணைந்தார்.
விரைவில் ராஜ்நாத் சிங்கை எதிர்த்து போட்டியிடும் வேட்பாளராக பூனம் சின்கா அறிவிக்கப்படுவார் என்று எதிர்பார்க்கப்படுகிறது. #ShatrughanSinha #PoonamSinhajoins #PoonamjoinsSP #SamajwadiParty
